Natur- og miljøforvaltning
Forskinga på natur- og miljøforvaltning tek opp i seg spørsmål knytt til ressursforvaltning, arealplanlegging, konsekvensutgreiingar, endringar i arealbruk og bruk og vern. Døme på aktuelle problemstillingar er konflikthandsaming og kva for verdiar ein legg vekt på i samband med større naturinngrep og korleis kan ein kome fram til eit godt kunnskapsgrunnlag for å utøve berekraftig arealforvaltning. I mange prosjekt har vi arbeidd med samproduksjon av kunnskap mellom brukarar (t.d. bønder og kommuneplanleggjarar) og forskarar som eit middel for berekraftig forvaltning av areal og ressursar.
Naturbruk er òg ein del av dette forskingsområdet. Kunnskapsutviklinga her handlar om tradisjonelle og nye friluftslivsaktivitetar, der døme på nye aktivitetar er stisykling og alpin skigåing. Vi ser på korleis lokalbefolkning og andre grupper brukar utmarka og korleis ulik bruk kan kombinerast for å skape attraktive lokalsamfunn og berekraftig bruk. Vestlandsforsking analyserer òg samspelet mellom tradisjonelt friluftsliv, kommersiell reiselivsaktivitet og styresmaktene si tilrettelegging og regulering. Problemstillingane på forskingsområdet er tverrfaglege og involverer fag som sosiologi, geografi, økonomi og miljøkunnskap.
Dei viktigaste akademiske samarbeidspartane på dette feltet er Høgskulen på Vestlandet, Nordlandsforskning, Norsk institutt for naturforskning og University of the Highlands and Islands (Storbritannia).
