Forskarane våre utfører tverrfagleg og bruksretta forsking både på regionalt, nasjonalt og internasjonalt nivå. Vestlandsforsking har rundt 37 tilsette og ein årsomsetnad på om lag 40 millionar kroner. Vi held til på Campus Sogndal i Sogndal, som ligg i Vestland fylke.

Vestlandsforsking utfører forsking på tre fagområde:

Klima og miljø: utsleppsreduksjon; klimatilpassing; planlegging og berekraftig utvikling; industriell økologi og naturressursforvalting

Reiseliv: opplevingsturisme; digitalisering; berekraftig reiseliv

Teknologi og samfunn: stordata og nye teknologiar; regional utvikling og digitalisering; kjønn, mangfald og teknologi

Forskingsprosjekt

Vestlandsforsking har ein lang tradisjon for å leie og delta i internasjonale forskingsprosjekt, både med finansiering frå EU-kommisjonen og andre kjelder. Sidan starten har instituttet delteke i 14 EU-finansierte forskingsprosjekt og leia fire. I 2024 hadde instituttet til saman 18 aktive, internasjonale prosjekt og samarbeid med forskarar i ei rekkje land i og utanfor Europa. 

På klima- og miljøfeltet starta vi i 2024 opp det internasjonale forskingsprosjektet IntegrateNBS om naturbaserte løysingar på klimautfordringar, med finansiering frå Joint Programming Initiatives (JPI). Eit anna fleirårig prosjekt som fekk støtte i 2024 er JustGreen, som handlar om rettferdig arealbruk for grøn omstilling. Prosjektet har nordiske partnarar, er finansiert av NordForsk og leia av Vestlandsforsking.

Klima- og miljøfeltet har elles større forskingsprosjekt som SusRenew og Shift-Plastics og klima- og reiselivsprosjektet TourRisk med finansiering frå Noregs forskingsråd. I TourRisk har vi med mange større, norske reiselivsaktørar og institusjonar og samarbeider med partnarar frå Australia, Canada og Nederland. I tillegg kjem TransAdapt, som hentar midlar frå grunnløyinga til Noradapt, eit senter Vestlandsforsking driv på vegner av åtte forskingsmiljø innan klimatilpassing.

Innan teknologi og samfunn har Vestlandsforsking hatt EU-finansierte forskingsprosjekt i over 30 år. For tida føregår det to større, nasjonale prosjekt med internasjonale samarbeidspartar: Socyti går ut på å utvikle metodar og verktøy for å avdekke hatprat og informere norske samfunnstenester om valdsframkallande åtferd på nettet. I JustTransform er målet å utarbeide eit rammeverk for ein berekraftig, rettferdig og inkluderande grøn og digital transformasjon. I tillegg samarbeider kjønns- og teknologiforskarar frå Vestlandsforsking med kollegaer frå Noreg og Australia i prosjektet Understanding Masculinity in Gaming.

Vestlandsforsking har òg hatt mange prosjekt med EØS-midlar. Nylege døme er Energy 2050, Polish Outdoor Learning, Smartfood og Co-Adapt.

Visjon:

Samskapande forsking for ei berekraftig framtid

Mål:

• Utvikle og formidle kunnskap for å gjere det grøne og digitale skiftet berekraftig, inkluderande og rettferdig
• Gje kommunar, stat og næringsliv kunnskap til å redusere klimautslepp, tilpasse seg til klimaendringar og ta omsyn til naturen sine tolegrenser
• Arbeide for ansvarleg innovasjon og omstilling med kunstig intelligens og nye teknologiar 
• Eit attraktivt arbeidsmiljø og ei sunn økonomisk drift

Vestlandsforsking sin strategi for 2025 - 2028 finn du her.

Finansiering

Prosjektinntektene finansierer den ordinære drifta i Vestlandsforsking. Tilskot i form av grunnløyvingar blir nytta til strategisk fagleg utvikling og kvalitetssikring.

Instiuttet vart stifta 13. mars 1985. Ved stiftinga gjekk Sogn og Fjordane fylkeskommune (stiftar), Kommunaldepartementet og 62 bankar, bedrifter, kommunar og organisasjonar i fylket inn med eit grunnfond på 4 millionar kroner.

Organisering

Instituttet er organisert som ei stifting. Denne blir leia av eit styre på sju. Vestland fylkeskommune vel fleirtalet av medlemmene og Noregs Forskingsråd vel eitt medlem. Styreleiar er Silja Ekeland Bjørkly.

Anne Karin Hamre er direktør og står for den daglege leiinga av instituttet. Forskingsgruppene ved instituttet blir leia av forskingsleiarar og administrative gruppeleiarar. Instituttet sine vedtekter finn du her.

Vestlandsforsking arbeider systematisk for å sikre likeverd, mangfald og god kjønnsbalanse, og instituttet har ein eigen likestillingsplan.