Kjønn, mangfald og teknologi
Det vert stadig viktigare å etablere kunnskap om kva føresetnader som vert skapt av og med teknologi i utviklinga av samfunnsinstitusjonar, kultur, identitet og kommunikasjon mellom menneske. Med utgangspunkt i samfunnsfagleg teknologiforsking, medieforsking, kvinne- og kjønnsforsking og minoritetsstudiar, studerer vi samproduksjon av teknologi, samfunn, kultur og identitet. Forskinga vår famnar tematisk bredt, med prosjekt knytt til digitalisering av offentlege tenester, barn og digital kompetanse, kjønn og teknologi-drivne yrkeskarrierar og minoritetsgrupper sin bruk av IKT. Med utgangspunkt i sosiale kategoriar, som t.d. kjønn og etnisitet, undersøker vi kva som formar ulike sosiale grupper si deltaking i teknologi-relaterte fagfelt og kontekstar, og korleis symbolske og diskursive strukturar vert forhandla om og forma i møtepunkt mellom kultur, identitet og teknologi.
Det er eit mål for forskinga vår å lære meir om kva mekanismar som verkar ekskluderande eller inkluderande for ulike sosiale grupper i høve til teknologi, for å kunne bidra med løysingar som kan gi inkluderande prosessar knytt til ny digital teknologi.
