Rettferdig arealbruk for grønn omstilling (JustGreen) er eit forskingsprosjekt som ser på konflikter som ofte oppstår i samband med arealbruksendringar kopla til den grøne omstillinga. Prosjektet skal utvikle eit rammeverk for å styrke dei demokratiske prosessane i den grøne omstillinga, og å redusere slike konfliktar. 

Fornybar energi står sentralt i den grønne omstillinga. Men fornybar energiproduksjon krev utvikling av infrastruktur og gruvedrift for utvinning av viktige mineral. Utbygging av fornybar energi er difor ein viktig drivar av arealbruksendringar i nordiske land. Desse arealbruksendringane fører ofte til konfliktar mellom utbyggarar, planleggingsmyndigheiter, miljøvernarar og lokale innbyggarar. For å sikre offentleg støtte til grøn omstilling, må desse konfliktane løysast på ein rettferdig og miljømessig forsvarleg måte.

I JustGreen utviklar deltakarane eit rammeverk for arealforvalting som kan bidra til å løyse arealbrukskonfliktar i den grøne omstillinga. Forskarane trekker inn teoriar om legitimitet, rettferdigheit og pluralistisk verdivurdering når dei utviklar eit nytt rammeverk for rettferdig arealbruk. 

Denne siste delen er viktig, sidan ei grunnleggande årsak til naturkrisa er at natur ikkje blir verdsett rett i avgjerdsprosessar. Forskarane i prosjektet skal bruke rammeverket til å studere pågåande og gjennomførte prosessar for arealbruksendring knytt til landbasert vindkraft og gruveprosjekt i fire land: Noreg, Finland, Danmark og Island. Dei skal analysere kunnskapsgrunnlaget for planprosessane i casane sine og vurdere i kva grad rettferdsperspektiv og pluralistisk verdsetting har påverka prosessane.

For å fremje teori og praksis om rettferdig arealbruk, vil prosjektet identifisere og teste metodar for konfliktløysing i arealforvaltingsprosessar. Rammeverket skal vere praktisk anvendbart for bruk i arealforvalting, og kan dermed bidra til å styrke demokratiseringa av grøn omstilling.