Arbeidet går ut på å utvikle eit teoretisk rammeverk for å analysere dei fem casa i prosjektet. Rammeverket skal legge vekt på rettferd knytt til miljø, klima og energi og kombinere det med det internasjonale naturpanelet (IPBES) sitt rammeverk for pluralistisk verdivurdering. Ragnhild Freng Dale ved Vestlandsforsking har ansvar for arbeidspakken.

Ved hjelp av rammeverket utvikla i arbeidspakke 1, skal forskarane studere korleis ulike interesser og verdiar, inkludert biologisk mangfald, klimaendringar og andre konkurrerande omsyn blir teke omsyn til i planleggingsprosessane for fornybar energi-infrastruktur og andre prosjekt knytt til industriutvikling, til dømes gruvedrift, i dei utvalde casa. Hannu I. Heikkinen ved Universitetet i Oulu har ansvar for denne delen av prosjektet.

Resultata frå verdianalysane av casa i arbeidspakke 2 skal brukast til å vidareutvikle og prøve ut konfliktløysingsprosessar med aktørane i casa der det gir meining å gjennomføre slike prosessar. Arbeidet skal munne ut i ei oversikt over policyverktøy som legg vekt på kontekst og kultur og kan brukast til å løyse konfliktar om arealbruk. Denne delen av prosjektet er leia av Irmelin Gram-Hanssen og Mari Hanssen Korsbrekke ved Vestlandsforsking.

I denne arbeidspakken blir resultata frå dei ulike arbeidspakkane trekte saman. Forskarane hentar ut innsikt frå dei fem casa i prosjektet om korleis ein kan bruke nye eller gamle policy-verktøy til å vekte verdiar. Kunnskapen herifrå vil brukast til å formulere råd til avgjerdstakarar også utanfor caseområda. Forskarane skal òg gå gjennom rammeverket for rettferdig arealbruk på nytt og føreslå ei tverrsektoriell tilnærming til arealbruk som kan byggjast inn i retningslinjer og lovgjeving. I samarbeid med brukarpartnarane, fem norske kommunar, har forskarane som mål å ta i bruk lærdommar frå planprosessane på ulike måtar, til dømes i kommuneplanar i casekommunane. Arbeidet er leia av Johannes Welling ved Universitetet på Island.