– Det er bra og viktig at forskarane våre tek på seg nasjonale verv. Dette gir både høve til å bidra inn med vår kunnskap og våre perspektiv, og gir samstundes nyttig og viktig kunnskap tilbake til heile organisasjonen vår, seier direktør Anne Karin Hamre.

Viktig i ein endra verdssituasjon

Dei nasjonale forskingsetiske komiteane (FEK) skal bidra til at forsking i offentleg og privat regi skjer i tråd med anerkjende etiske normer. Komiteen der Hans Jakob Walnum har fått innpass for dei neste fire åra, er Den nasjonale forskingsetiske komité for samfunnsvitskap og humaniora (NESH). Det finst òg ein komité for medisin og helsefag og ein for naturvitskap og teknologi.

I det årlege tildelingsbrevet framhevar Kunnskapsdepartementet at verdsbiletet er endra. Departementet ber FEK om å vurdere dei overordna mål og prioriteringer i lys av dette.

– Dette er eit veldig spennande verv, sett i lys av lys av det som no skjer i USA, som utfordrar forsking og forskingsfriheit, ikkje minst på område som klima og miljø og kjønn og mangfald, som er sentrale forskingstema ved Vestlandsforsking. I tillegg må vi framover sikre ansvarleg bruk av KI i forskinga, seier Hans Jakob.

Hans Jakob Walnum

– Ei anerkjenning av fagmiljøet

Hans Jakob har jobba ved instituttet sidan 2008, og er i dag seniorforskar og gruppeleiar for klima- og miljøforskarane. Forskingsfeltet hans er sirkulærøkonomi, berekraftig mobilitet og berekraftig energi. I år er han og fleire kollegaer aktuelle med ei ny fagbok. Denne spring ut av eit forskingsprosjekt Walnum har leia, der temaet er korleis vi kan hindre at plast frå fiskeri og havbruk hamnar på avvege og blir til mikroplast i havet.

– Det at eg blir oppnemnd er ei anerkjenning av fagmiljøet ved Vestlandsforsking, og det blir særs spennande å delta og påverke arbeidet til NESH i åra framover, seier Hans Jakob.

Ideelt verv for kjønn- og mangfaldsforskar

Hilde G. Corneliussen har fått ein plass i Komité for kjønnsbalanse og mangfold i forskning og høyere utdanning (Kif) for perioden 2026 til 2029. Kif jobbar for betre kjønnsbalanse og større mangfald blant studentar og fagleg tilsette i akademia. I september 2025 la komitéleiar og UiO-rektor Ragnhild Hennum inn eit besøk i Sogndal saman med fleire medlemmer av den førre Kif-komiteen. Vestlandsforsking fekk høve til å presentere seg, både med vekt på relevant forsking og som organisasjon.

Den nyoppnemnde Kif-komiteen har ti medlemmer og sju varamedlemmer, og Hilde er oppnemnd som tredje vara.

– Inkludering og mangfald i utdanning og forsking har vore eit sentralt tema i mi eiga forsking sidan eg starta på ein doktorgrad i 1998. Det er utruleg kjekt å bli invitert til å delta i Kif-komiteen, som jobbar for å oppnå inkludering i praksis i akademia, seier ho.

26 års forsking

Hilde G. Corneliussen gjekk frå Universitetet i Bergen til Vestlandsforsking i 2013 og er i dag leiande seniorforskar og forskingsleiar for teknologi og samfunn. Ho har forska på mangfald og inkludering i teknologifag i over 26 år, og har gitt ut to fagbøker om temaet, sist i 2024 fagboka «Reconstructions of Gender and Information Technology: Women Doing IT for Themselves». 

Hilde G. Corneliussen har oppsummert forskinga si på rekruttering av kvinner til IT-sektoren i ei fagbok. Forskinga gjer ho svært kvalifisert til vervet i Kif-komiteen. Foto: Idun A. Husabø

Her deler ho funn frå nokre av dei siste forskingsprosjekta sine om rekruttering av kvinner til jobb og utdanning innan teknologi, med vekt på kva som faktisk får kvinner til å satse på ein karriere på eit såpass mannsdominert felt.

Meir vekt på utdanning

Under besøket i Sogndal i haust orienterte Ragnhild O. Hennum om at komiteen framover skal jobbe meir med inkludering og mangfald, ikkje berre i forsking, men også i utdanning. Det ser Hilde fram til å vere med på.

– På mange område har det vore ein positiv trend for mangfald i utdanning, men framleis er teknologifaga langt meir mannsdominerte enn mange andre fag, fortel ho.

Hilde trur erfaringa frå alle åra med forsking på temaet blir nyttig i komitéarbeidet.

– Eg gler meg særleg til å ta i bruk forskinga mi for å diskutere og samarbeide med universitet, høgskular og forskingsinstitutt om å jobbe for inkludering og mangfald også innan dei sterkt mannsdominerte fagområda, avsluttar ho.