Sogndal skisenter - Hodlekve skal utviklast for framtida, og Sogndal kommune er i gang med planarbeidet.

Det er naturleg nok delte meiningar om kva som er det ideelle scenarioet for den komande planperioden på 35 år, og kommunen ønskjer å trekke inn innbyggarar og ulike interessegrupper slik at alle kjem til orde.

Det siste året har Vestlandsforsking, Sogndal kommune og ei gruppe utvalde deltakarar jobba fram eit sett med verdiar, prinsipp og scenario for vidare utvikling i det populære utfarts- og hytteområdet i Sogndalsdalen. Vestlandsforsking ønskjer no å dele ideane og perspektiva som har kome fram, for å få innspel frå fleire.

– I vinter har vi hatt ein fin prosess med tre arbeidsverkstader der vi inviterte deltakarar som representererer ulike interesser og måtar å bruke området på. No ønskjer vi å høyre korleis perspektiva som kom fram, resonnerer med folk flest i Sogndal og eventuelt få fram andre syn på saka, seier Irmelin Gram-Hanssen, som leier arbeidet ved Vestlandsforsking.

Open verkstad

Onsdag 3. september inviterer Vestlandsforsking og Sogndal kommune til ein såkalla «open verkstad» i Fjøra. I det legg dei at dei frammøtte blir oppmoda til å diskutere med kvarandre og gje arrangørane innspel. Alle interesserte er velkomne.

Arbeidsverkstaden 3. september finn stad kl. 18–20 på kafeen Det gule huset i sentrumsparken. Som eit lite trekkplaster, stiller arrangørane med bakst og kaffi.

– Kommunen orienterer først om planprosessen i Hodlekve. Etterpå vil Vestlandsforsking dele nokre av ideane som har kome fram til no. Til slutt legg vi opp til samtalar i grupper, seier Gram-Hanssen.

Det som kjem fram på verkstaden, blir samanfatta i ein rapport til kommunen som dei kan bruke i den vidare planprosessen sin.

Del av forskingsprosjekt

Vestlandsforsking følgjer medverknadsprosessane knytt til Hodlekve si framtid gjennom eit internasjonalt forskingsprosjekt. «Integrate nature-based solutions» starta opp parallelt med prosessen i Hodlekve. Det treårige forskingsprosjektet legg mellom anna vekt på at prosessar som den i Hodlekve skal bygge opp under sosial rettferd og samhøyrigheit.

– Litt av kjernen i forskinga er å sikre at ulike stemmer kjem fram og at partane i prosessar verkeleg lyttar til kvarandre. Det inkluderer også grupper som ikkje vanlegvis blir høyrde og «tause» aktørar, som dyreliv og natur.

Les meir om forskinga: "Framtidas Hodlekve tema i nytt forskingsprosjekt"