Vitskapleg litteratur som er gjennomgått i prosjektet VANNKLIMRISK viser at klimaendringar som global oppvarming med endra årstemperatur og kraftigare nedbør og oftare styrtnedbørepisodar gir både direkte og indirekte effektar på miljøgifter lagra i jorda på ureina lokalitetar og i vassmiljøet. Dei direkte effektane av klimaendringar er at auka nedbør og styrtnedbørepisodar fører til utvasking og forflytting av ureining og miljøgifter frå deponi og ureina grunn og fører til større avrenning frå landbruket og ureina by- og industriområde. Havnivåstigning vil påverke bølgebryting og stormflonivået ved kysten og føre til at saltvatn trenger lenger inn i kystsona og kan gje auka erosjon og utgraving av ureine massar. Saltvatnet kan då løyse opp og ta med seg miljøgifter frå land til sjø når det trekk seg tilbake. Auka overflatetemperatur bidreg til issmelting, hyppigare tørke og skogbrannarsom gjev auka utslepp av miljøgifter. Særleg bekymring knytes til flyktige miljøgifter, som Hg og POPs, som vert transportert langt av garde frå utsleppspunkta til høgtliggande og kalde områder på jordkloden (grashoppeeffekten). 

Indirekte effektar av klimaendringar er at auka årstemperatur og meir nedbør også påverkar naturskadehendingar som skred og flaum, som kan auke forflytting av miljøgifter frå ureina grunn på land til bekkar, elvar, vatn og fjord/hav. Klimaendringar påverkar også giftalgeoppblomstring i sjø, som vil auke nivået av algetoksin i sjølevande organismar. Ei gradvis forsuring av havet er også ein effekt av globale klimagassutslepp som er skadeleg for levande organismar i seg sjølv, men vil også påverke opptaket av og giftigheita av miljøgifter og mikroplast i sjølevande organismar. 

Både direkte og indirekte effektar av klimaendringar vil bidra til å auke tilførsel av og konsentrasjon av miljøgifter i vassmiljø og kor tilgjengeleg dei skadelege stoffa er for opptak i organismar. Men, klimaendringar vil også påverke kor raskt stoffa skiljast ut eller vert avgifta i organismar sidan metabolismen i mange vasslevande organismar aukar med aukande temperatur i sjøen.