Under besøket i Sogn fekk statsråden sjå mange spennande og nyskapande initiativ i regionen. Etter å ha vitja Digitaliseringsdirektoratet, Statsforvaltaren i Vestland og fått omvising hjå Statens vegvesen, møtte statsråden fleire verksemder som både fekk høve til å presentere eigne arbeidsfelt og korleis vi samarbeider på tvers for å byggje kompetanse og bidra til utviklande og attraktive arbeidsplassar i regionen.

Verksemdene som deltok på møtet, var Vestlandsforsking, Høgskulen på Vestlandet, Nav Økonomiteneste, Highsoft, Rocketfarm, Tilsynet for universell utforming av IKT, Statens vegvesen og Statsforvaltaren i Vestland.

Fortalde om satsing

Direktør ved Vestlandsforsking, Anne Karin Hamre. (Foto: Falkeblikk)

Direktør Anne Karin Hamre fortalde om Vestlandsforsking si forsking innan grøn og digital omstilling, bruk av kunstig intelligens og digitale verktøy til å styrke arbeidet med samfunnssikkerheit, og korleis vi arbeider for å byggje kompetanse og kapasitet innan digitalisering og teknologi i regionen. Høgskulen på Vestlandet og Vestlandsforsking har nyleg ferdigstilt det seksårige kapasitetsløft-prosjektet Teknoløft, som har bidrege til eit langt større fagmiljø og fleire nye satsingar innan teknologi og digitalisering i regionen.

Peika på behov

Statsråden spurte om korleis interessa er hjå næringslivet i Vestland er for å medverke i og ta i bruk forsking. Mange lokale verksemder er interessert, men både Hamre og Erik Kyrkjebø frå Høgskulen peika på at mangel på tid og kapasitet er ei utfordring i mange små og mellomstore bedrifter. Dette syner behovet for verkemiddel som bidreg til å kople saman bedrifter og forskingsmiljø. – Nett difor er det uheldig om FORREGION, som er mange mindre bedrifter sin første inngang til forsking, vert avvikla, slik det er kome framlegg om i neste års statsbudsjett, sa Hamre og Kyrkjebø.