Kritisk til at regjeringa vil kutte ordning for forsking og innovasjon i næringslivet
ressurs, arrangert av kompetansemeklarane frå Vestlandsforsking i FORREGION
- Bedrifter som tek i bruk forsking for å omstille seg og bli meir innovative, er framtidas vinnarar. Difor er det uforståeleg at regjeringa vil avvikle FORREGION, ei ordning som mobiliserer næringsliv over heile landet til å forske meir, seier direktør i Vestlandsforsking, Anne Karin Hamre.
Kvart år får rundt 1800 bedrifter i heile Noreg hjelp til å ta i bruk forsking i sitt utviklings- og innovasjonsarbeid gjennom den nasjonale ordninga FORREGION – Forskingsbasert innovasjon i regionane. Fylkeskommunane har ansvaret, og i Vestland er det Vestlandsforsking og Høgskulen på Vestlandet som gjennomfører oppdraget.
Mange små og mellomstore bedrifter manglar tid og økonomi til å arbeide systematisk med forsking og til å orientere seg mot forskingsmiljø som kan bidra i utviklingsarbeidet. Gjennom FORREGION får bedriftene gratis hjelp til å avklare forskingsbehov, hjelp til søknader og til å kome i kontakt med aktuelle forskingsmiljø frå kompetansemeklarar som kjenner regionen godt. Det er òg høve til å søkje støtte til mindre forskingsprosjekt i FORREGION. Etter å ha gjennomført dette første steget, er det mange bedrifter som går vidare med større satsingar med finansiering frå Forskingsrådet og EU.
Nærleik og lokalkunnskap er viktig for bedriftene
To av mange bedrifter som har hatt støtte frå FORREGION og Vestlandsforsking sine kompetansemeklarar, er Retrams AS i Florø og Balholm AS i Balestrand.
- Det at Retrams med sine helsesatsinger med utspring fra Florø har lykkes så godt er mye takket være den kompetansen og virkemidlene vi har lett tilgjengelige tett på oss. Da handler det mye om å kjenne oss, at miljøet er tett på og ikke minst lett tilgjengelig.
Her nevnes spesielt lokal kunnskap, Innovasjon Norge, inkubatormiljøer, forskermiljøer , Vestlandsforsking, etc. Slår man disse i sammen og bruker de rett og ikke minst, til rett tid så skaper man VINNERE og vilje til å tenke STØRRE, RASKERE og på den måten vil andre også tørre satse. Det seier Stein-Asle Øvrebotn, dagleg leiar i Retrams AS i Florø.
Med støtte frå Innovasjon Norge, Helse Vest og nye forskingssamarbeid utvikla Retrams AS ein skannar ved bruk av KI-teknologi som gjer det mogeleg å identifisere kirurgisk utstyr basert på produktet sine unike DNA. Dette gir betre oversikt over sjukehusutstyret, mindre bruk og kast, og ei meir effektiv sjukehusdrift. I utviklingsarbeidet sitt har bedrifta hatt rådgjeving og forprosjektmidlar frå FORREGION, før dei fekk løyving frå Forskingsrådet til eit innovasjonsprosjekt i perioden 2024-26 for å robotisere og automatisere enno fleire oppgåver ved sjukehusa. Bedrifta var ein av fem finalistar til Forskingsrådet sin Innovasjonspris for 2025.
FORREGION ga tryggleik til å satse vidare på FoU-arbeid
Balholm AS i Balestrand lagar drikke av frukt og bær, med og utan alkohol. I dag har verksemda 11 tilsette, og produserer ca. 700 000 liter drikke i året. Dei arbeider òg for å auke økologisk fruktproduksjon i Sogn. Gjennom FORREGION si Forskar til låns-ordning, har ein forskar frå Nofima bidrege i verksemda sitt utviklingsarbeid. Ein av Vestlandsforsking sine kompetansemeklarar, Ivar Petter Grøtte, har vore diskusjonspartnar for Balholm og hjelpte til å lage ein søknad då det vart aktuelt for dei å låne ein forskar for ein periode. No deltek han i drøftingar om vegen vidare om korleis Balholm kan bruke forsking i deira innovasjonsarbeid. Balholm er i gang med eit FoU-prosjekt der dei tørkar pressmassen frå mostproduksjon til eplefiber, som kan brukast i bakverk. - FORREGION-forprosjektet vi gjennomførte med Nofima var avgjerande for å finne riktig tørketeknikk og engasjere potensielle kundar med eplefiberprøvar. Kompetansemeklar Ivar Petter si rettleiing når det gjeld prosjektkultur og verkemiddelapparatet har gitt oss tryggleik til å satse på FoU-arbeid vidare, seier prosjektleiar Jesse Bratt og styreleiar Eli-Grete Høyvik i Balholm AS.
Kutt i FORREGION hemmar omstilling og innovasjon
I sitt framlegg til statsbudsjett for 2026 føreslår regjeringa å avvikle FORREGION. Perspektivmeldinga, NHO sin rapport «Draghi på norsk» og regjeringa sin strategi for å auke næringslivet sine investeringar i FoU framhevar alle at innovasjon og omstilling må prege utviklinga av framtidas arbeidsplassar, og at forsking og utviklingsarbeid er avgjerande for at norske bedrifter skal hevde seg i tida framover. - Då er det alvorleg at regjeringa vil avvikle ordninga som er veldig mange bedrifter sitt første steg på vegen inn i forskinga. Dette skjer i ei tid der vi meir enn nokosinne treng forsking for omstilling og innovasjon over heile landet, seier Anne Karin Hamre. Saman med dei andre direktørane i dei regionale forskingsinstitutta har ho skrive ein uttale til politikarar på Stortinget, med ei sterk oppmoding om at innsatsen for forskingsbasert innovasjon i små og mellomstore bedrifter treng å styrkjast, ikkje avviklast.
