Kunnskapssenter for reiseliv vart ein realitet like før årsskiftet, då det var klart at finansieringa var på plass, takka vere løyvingar frå fleire regionale aktørar. Den offisielle opninga fann stad i Vestlandsforsking sine lokale 19. desember 2024.

Reiseliv og offentlege aktørar

På oppstartmøtet i Bergen 4. februar stilte mange av aktørane i reiselivet i Vestland, som Visit Sognefjord, Visit Bergen, Visit Hardangerfjord, Visit Sunnhordland, Sogn Næring, Norway’s Best og Norsk Reiseliv. I tillegg møtte det fram representantar for offentlege verksemder som Fjordane regionråd, Hardangerrådet, KS Vestland og Vestland fylkeskommune, som var vertskap på Vestlandshuset.

Diskuterte utfordringar i reiselivet

Eit knippe forskarar frå Vestlandsforsking og Høgskulen på Vestlandet tok opp aktuelle utfordringar i reiselivet, som opphoping av turistar i visse område, kva problem kunstig intelligens kan tenkast å løyse, korleis reiselivet kan auke verdiskapinga med lokal mat og drikke, aukande fare for skred, flaum og annan klimarisiko der turistar ferdast og korleis reiselivsnæringa kan auke verdiskapinga ved å tilby meir lokal mat og drikke.

Dette er tema som har vore forska på og som det vil bli forska meir på i tida som kjem. Dei frammøtte hadde mykje på hjartet og bidrog med verdifulle synspunkt og observasjonar. Desse innspela vil utgjere grunnlaget for forskingsprosjekta til Kunnskapsenteret.