Agnes inn i Strategisk råd for reiseliv
Seniorforskar Agnes Brudvik Engeset ved Vestlandsforsking blir medlem av Innovasjon Norge sitt strategiske råd for reiseliv. Rådet skal mellom anna bidra til å forme Innovasjon Norge si satsing på reiseliv. – Her vil eg vil gjerne bidra med ny kunnskap basert på forsking, seier ho.
Seniorforskar Agnes Brudvik Engeset ved Vestlandsforsking er ein av til saman 16 personar som sit i det strategiske rådet, som er oppnemnd av leiargruppa i Innovasjon Norge.
Dei andre medlemmane har i hovudsak bakgrunn frå reiselivsnæringa. Agnes blir den einaste forskaren i rådet. Ho ser fram til å delta i rådsmøta, som kjem til å finne stad minimum to gonger i året.
– Det er kjekt å bli spurd, seier ho.
Bringer inn ny forsking
Fem av rådsmedlemmane er nyoppnemnde i år. Dei andre nye er Arne Jørgen Skurdal i Visit Øst-Norge; destinasjoneleiaren i vintersportselskapet SkiStar, Gudrun Sanaker Lohne; Hurtigruten sin administrerande direktør, Hedda Felin og Petra Sestak-Flagestad, CEO i Explore Trøndelag.
– Eg tenker at Innovasjon Norge har ei viktig rolle i utviklinga av norsk reiseliv, både i utvikling av norsk reiselivsnæring, men òg kvar ein marknadsfører seg. Her vil eg vil gjerne bidra med ny kunnskap basert på forsking, seier Engeset.
Vervet gjeld for dei komande 2 åra, frå starten av 2025 og ut 2026.
