Av: Agnes Landstad

Gjennom året vil vi markere 25-årsjubileet med ei fagleg seminarrekke der vi tek opp aktuelle samfunnsproblemstillingar og vonar å skape debatt rundt forskingstema vi arbeider med.

Vestlandsforsking såg dagens lys 13.mars 1985. Stiftaren var Sogn og Fjordane fylkeskommune, med god hjelp frå kommunar, bankar og bedrifter i fylket, samt Norges Forskingsråd. Reisa har vore mangslungen, frå Sogndalsfjøra til Shanghai. Vi starta med praktiske og nære problemstillingar som ”Kvifor står du her? Køyre- og parkeringsmønster i Sogndal sentrum”, drog vidare til Brussel og henta heim Euro Info Centre, men trekte som ungdom flest fort ut igjen til Oslo og Oxford, Bergen og Berlin. Lengst gjekk reisa til Shanghai, og heim kom vi med ryggsekken fylt med nytt og nyttig å ta i bruk her heime. Kanskje hadde vi også med oss noko heimanfrå, som var verd å lære bort og ta i bruk av andre.

I denne vekslinga mellom det Vestlandske og det internasjonale lever Vestlandsforsking. Vi tek med oss problemstillingar frå bygdene våre, samfunnsaktuelle problemstillingar frå vår røyndom, inn i den nasjonale og internasjonale forskinga. Og vi tek med oss kunnskap frå dei internasjonale forskingssamarbeida tilbake til samarbeidspartane våre. I dette samspelet kan vi bidra til at dei rurale problemstillingane i Sogn og Fjordane blir tekne inn i nasjonal og internasjonal forsking. Og til at framifrå kunnskap frå nasjonale og internasjonale forskingsarbeid kan nyttast i samfunnsutviklinga i Sogn og Fjordane. Grunntanken frå 1985 er såleis framleis gyldig. Men jo, vi har litt om senn blitt vaksne, litt tyngre, litt rundare…