Konferansen SUSTECH 2014, der Andersen skal leie ein sesjon, spring ut av eit ingeniørmiljø ved Portland State University i delstaten Oregon. Arrangørane arbeider særleg med elektronikk og berekraftig teknologi.

Otto Andersen er utdanna biokjemikar og har ein doktorgrad i transport og industriell økologi. Dei siste 19 åra har han forska tverrfagleg på problemstillingar knytt til industri, helse og miljø. I 2013 gav forlaget Springer ut boka Unintended Consequences of Renewable Energy der han samanfattar kunnskap om negative følgjer av satsing på fornybar energi.

I sesjonen Andersen skal leie, kjem han til å gå gjennom dei viktigaste delane av boka. Eit særleg aktuelt tema er såkalla rebound effects. Omgrepet viser til at nye miljøproblem kan dukke opp når ein lanserer teknologi som i utgangspunktet skal vere miljøvenleg. I tillegg tek han opp aktuelle tema som har kome til etter bokutgjevinga, mellom anna livsløpsanalysar av elbilar (ein miljøanalyse av produktet sitt liv frå produksjon til destruksjon) og følgjer av å blande inn biodiesel i anna drivstoff.

Andersen skal presentere forskinga si på den same konferansen. Også her er den metodiske tilnærminga livsløpsanalysar, i dette tilfellet analysar av elektronikkprodukt. Det Andersen legg fram i juli skal seinare publiserast i eit tidsskrift utgitt av teknologiorganisasjonen IEEE.

Sesjonen Unintended Consequences of Renewable Energy