Forskar innan innovasjon, teknologi og samfunn

test
A bird's eye view of Sogndal's university college campus and stadium buildings, where WNRI's offices are located. Foto: Falkeblikk AS

Vestlandsforsking er eit forskingsinstitutt som utfører oppdrag for offentleg forvaltning og næringsliv både nasjonalt, regionalt og internasjonalt. Vi er 25 personar i eit spennande fagmiljø som arbeider med forsking innan klima, miljø, energi, IKT, regional utvikling og reiseliv. Vi held til på Fosshaugane Campus i Sogndal. På Campus er vi lokalisert i eit aktivt og internasjonalt forskings-, utdannings-, idretts- og bedriftsmiljø med over 500 tilsette og eit aktivt studentmiljø ved Høgskulen i Sogn og Fjordane. Sogn og Fjordane er kjend for fantastisk natur og gode forhold for aktivt friluftsliv sommar som vinter.

Vestlandsforsking søkjer etter forskar innan innovasjon og samspel mellom teknologi og samfunn.

Vi har for tida god prosjektinngang, og treng å styrke innovasjonsforskinga ved instituttet. Vi søkjer etter medarbeidar med kompetanse og interesse for innovasjon og innovasjonsprosessar både i privat og offentlig sektor. Har du erfaring frå arbeid med samfunnsmessige utfordringar knytt til teknologi/IKT og omstilling, er det positivt.

I tillegg til å inngå i prosjektarbeid er utvikling av nye prosjekt og publisering og formidling av forskingsresultat oppgåver som ligg til forskarstillinga.

Vi ser etter dyktige og motiverte medarbeidarar med erfaring frå forsking og helst med utdanning på doktorgradsnivå. Personar med mastergrad og relevant erfaring er og aktuelle.

Du må vere sjølvstendig og trivast med å arbeide med oppdragsforsking. Det vil bli lagt vekt på formell kompetanse, publisering og anna dokumentert forskingsinnsats, personlege eigenskapar og nettverk. Vi legg vekt på gode samarbeidsevner og evne til å inngå i faglege fellesskap på tvers av disiplinar. Som forskar må du vidare ha god munnleg og skriftleg formuleringsevne både på norsk og engelsk.

Vi kan tilby fagleg interessante og utviklande oppgåver, godt arbeidsmiljø, gode samarbeidsnettverk, fleksibel arbeidstid, bedriftsidrettslag, gode pensjons- og forsikringsordningar og gode velferdsordningar.

Lønn etter avtale. Arbeidsstaden er Sogndal.

For nærare informasjon om stillingane:
Forskingsleiar Ivar Petter Grøtte, tlf: 90828418, e-post: ipg@vestforsk.no
Direktør Merete Lunde tlf: 99607678, e-post: ml@vestforsk.no

Send søknad med CV og publikasjonsliste elektronisk til: post@vestforsk.no

Rettkjende kopiar av vitnemål og attestar/anna dokumentasjon sender du til: Vestlandsforsking, Postboks 163, 6851 Sogndal

Søknadsfrist er 15. september 2014